Psa 135 | NdeIBE | STEP | Dumisani uJehova. Dumisani ibizo likaJehova; mdumiseni lina zinceku zikaJehova,

Psalms 135

1 Dumisani uJehova. Dumisani ibizo likaJehova; mdumiseni lina zinceku zikaJehova,

2 lina eliqhuba inkonzo endlini kaNkulunkulu, emagumeni endlu kaNkulunkulu.

3 Dumisani uJehova ngokuba uJehova ulungile; hlabelani indumiso ebizweni lakhe ngokuba lokho kuhle.

4 Ngokuba uJehova usemkhethile uJakhobe ukuba ngowakhe, u-Israyeli ukuba yinotho yakhe eligugu.

5 Ngiyazi ukuthi uJehova mkhulu, ukuthi uJehova wethu mkhulu udlula bonke onkulunkulu.

6 UJehova wenza loba yini ayifunayo, emazulwini lasemhlabeni, ezilwandle lasezinzikini zazo.

7 Wenza amayezi aqubuka emikhawulweni yomhlaba; uthuma umbane kanye lezulu, avulele umoya oseziphaleni zakhe.

8 Wawalahla phansi amazibulo aseGibhithe, amazibulo abantu lawezinyamazana.

9 Wathumela izibonakaliso lezimangaliso zakhe phakathi kwakho, wena Gibhithe, phezu kukaFaro lezinceku zakhe zonke.

10 Wazilahla phansi izizwe ezinengi wabulala amakhosi alamandla –

11 uSihoni inkosi yama-Amori, u-Ogi inkosi yaseBhashani lawo wonke amakhosi aseKhenani

12 wanika ilizwe labo laba yilifa, ilifa labantu bakhe, u-Israyeli.

13 Ibizo lakho, O Jehova, limi kuze kube nininini, udumo lwakho, O Jehova, ezizukulwaneni zonke.

14 Ngokuba uJehova uzabalamulela abantu bakhe abe lesihawu ezincekwini zakhe.

15 Izithombe zezizwe ziyisiliva legolide, zenziwe ngezandla zabantu.

16 Zilemilomo, kodwa kazikhulumi, amehlo, kodwa kaziboni;

17 zilezindlebe, kodwa kazizwa, njalo kazilamphefumulo emilonyeni yazo.

18 Labo abazenzayo bazakuba njengazo, kanjalo lalabo bonke abathemba kuzo.

19 Wena ndlu ka-Israyeli, dumisa uJehova; wena ndlu ka-Aroni, dumisa uJehova;

20 wena ndlu kaLevi, dumisa uJehova; lina elimesabayo, dumisani uJehova.

21 Udumo alube kuJehova lusuka eZiyoni, kuye ohlala eJerusalema. Dumisani uJehova.